PROVINCIAL CAPITOL, STA. CRUZ, LAGUNA-----Iniatras na ni dating Laguna Provincial Administrator at kumandidatong Gobernador Dennis Lazaro ang inihain nitong Election Protest sa COMELEC laban kay dating Pagsanjan Mayor Jeorge E.R. Ejercito Estregan na ngayo'y Gobernador ng lalawigan ng Laguna.

Sa tatlong pahinang Motion to Withdraw Protest na ipinalabas ng Commission on Elections, isinasaad na sa masusing pag-aaral at konsultasyon sa buong pamilya Lazaro, mga lider pulitiko at mga supporters ng nag-protestang si Dennis Lazaro, ilalaan na lamang umano nito sa mas positibong aksiyon ang kaniyang kilos na makakatulong sa kaniyang kalalawigan. Isang pag-aaksaya lamang aniya sa oras at panahon kung ipagpapatuloy pa ang naturang protesta. Ang Election Protest ay isinampa ni Dennis Lazaro sa COMELEC makaraang tambakan ito ng 74,000 votes ng nakaraang May 2010 election na nagtulak dito na maghain ng protesta sa pag-aakalang siya'y dinaya ng ngayo'y Gobernador Jeorge E.R. Ejercito Estregan.

// Arlene P. Mariposque